मंसिरभित्रै उपचुनाव गर्न दलहरूको सुझाव

काठमाडौं : निर्वाचन आयोगलाई मंसिरभित्रै  उपचुनाव गर्न राजनीतिक दलहरूले सुझाव दिएका छन्। बिहीबार निर्वाचन आयोगमा भएको सर्वदलीय बैठकमा उपस्थित उनीहरूले चाडबाडहरू सकिएपछि मंसिर पहिलो साता निर्वाचन गर्ने गरी तयारी थाल्न सुझाव दिएका हुन्।

बैठकपछि निर्वाचन आयोगका प्रवक्ता शंकरप्रसाद खरेलले मंसिरभित्रै चुनाव गर्नुपर्छ भन्नेमा दलका प्रतिनिधिहरूको एकमत रहेको बताए। बैठकमा  संघ, प्रदेश र स्थानीय तहमा प्रतिनिधित्व गर्ने १८ वटा राजनीतिक दलहरू सहभागी थिए। निर्वाचन आयोगको विवरण अनुसार अहिले ५० ठाउँमा उपनिर्वाचन गराउन पर्नेछ।