नख्खु खोलाको बहाव ३८ वर्षअघिकै ठाउँमा फर्काइँदै

ललितपुरस्थित नख्खु खोलको बहावलाई ३८ वर्षअघिकै ठाउँमा फर्काइने भएको छ। अधिकारसम्पन्न वाग्मती सभ्यता एकीकृत विकास समितिले नदीको पुरानै बहाव कायम गर्ने गरी काम थालिसकेको छ।

यसका लागि तत्कालीन प्रधानमन्त्री तथा मन्त्रिपरिषद्को कार्यालयले गरेको निर्णयअनुसार ०७० माघसम्ममा नख्खु खोलको अतिक्रमित क्षेत्र खाली गर्न परिपत्र गरेको देखिन्छ। त्यो परिपत्रअनुसारको निर्णयलाई समितिले अहिले कार्यान्वयनमा ल्याएको खबर आजको कान्तिपुरमा छ ।

निर्णयअनुसार कुसुन्तीको हकमा नदीको बहाव क्षेत्र ०२१ को नापीअनुसार कायम गर्ने उल्लेख छ।
त्यहीअनुरूप समितिले पहिलो चरणमा वाग्मती दोभानदेखि तीन किलोमिटर दक्षिण कान्तिपुर कोलोनीसम्म काम सुरु गर्ने जनाएको छ । यसका लागि करिब ९१ करोड रुपैयाँको ठेक्का दिइसकिएको छ।