त्याग

-रोशन यक्सो  

पश्चिम क्षितिजमा डुब्दैगरेको 

बूढो घाम भन्दैथियो -

डुबिनंभने म अहिले 

कसरी उदाउँछ अको॔ विहानी ? 

कसरी सुरु हुन्छ जिन्दगीको नयाँ अध्याय ? 

चर्को घाममा दिनभर तात्तिएको 

सागर भन्दैथियो -

बाफिएर बादल बनेर आकाशबाट  

म बषि॔नंभने बेलाबेला 

कसरी चल्छ यो शृष्टि ? 

कसरी बाँच्छ यो जगत ? 

शिशिर याममा पुरै नाङ्गिएको 

वनपाखा भन्दैथियो -

अहिले म भइनंभने उजाड/उदास 

अहिले म भइनंभने नाङ्गेझार 

कसरी पलाउँछ नयाँ पालुवा ? 

कसरी आउँछ वसन्त हरियाली ?  

एउटा शिल्पकारको हातमा परेको 

पत्थर भन्दैथियो -

मैले खपिनंभने छिनोको मार 

मैले सहिनंभने अलिअलि चोट 

कसरी बन्नसक्छु अजर/अमर कृति ?

कसरी बन्नसक्छु एउटा सुन्दर मूर्ति ?

असारमास आफ्नो कर्ममा व्यस्त 

किसान भन्दैथियो -

घिनाएँभने म यो हिलोसँग 

बगाइनंभने अहिले पसिना 

कसरी भित्र्याउँला मंसिरमा सुनका दाना ? 

कसरी पुरा गरूँला जनजनको बाँच्ने चाहना ? 

फाँसीको फन्दामा लट्कनुअघि 

क्रान्तिकारी योद्धा भन्दैथियो -

अहिले दिइनंभने मैले बलिदान 

अहिले भइनंभने म सहादत 

कसरी पाउँछ यो देशले मुक्ति ? 

कसरी आउँछ सुनौलो बिहानी ?  

मध्यरातमा राहुल र यसोधरा छोड्नुअघि

सिद्धार्थ भन्दैथियो -

अहिले छोडिनंभने मैले दरबार 

अहिले त्यागिनंभने मैले घरबार 

कसरी प्राप्त गरुँला बुद्धत्व ? 

कसरी बनुँला म बुद्ध ? 

यत्रो मनकारीहरुको भिडमा 

यत्रो त्यागीहरुको बीचमा  

उमात्र यस्तो भेटेँ

जो भन्दै थियो -

अहिले कुम्ल्याइनंभने भेटेजति 

अहिले सोहोरिनंभने पाएजति 

कसरी गर्नु मैले मोजमस्ती ?

कसरी धान्नलान् मेरा सातपुस्ता ?

र, ऊ को हो ? 

त्यो तपाईंलाई नि थाहा छ !